కలకలం రేపిన తీన్మార్‌ మల్లన్న కామెంట్స్‌!

May 1, 2022

కలకలం రేపిన తీన్మార్‌ మల్లన్న కామెంట్స్‌!

Teenmar Mallanna: తెలంగాణ రాష్ట్రంలో నిజాయితీ గల వ్యాఖ్యాతగా, రాజకీయ నాయకునిగా గుర్తింపుతెచ్చుకున్న తీన్మార్‌ మల్లన్న తాజా చేసిన వ్యాఖ్యలు సంచలనం రేపాయి. బీజేపీతో ఆయన కటీఫ్‌ చెప్పారు. ఇకపై తాను బీజేపీ కార్యాలయానికి వెళ్లబోనని ప్రకటించారు. దీంతో ఆయన పార్టీ మారుతారా..లేక అక్కడే ఉండి ప్రజా పోరాటం కొనసాగిస్తారా అన్న దానిపై రాష్ట్రంలో కొత్తగా చర్చ మొదలైంది. తాజాగా 7200 పేరుతో కార్యక్రమాన్ని నిర్వహించిన తీన్మార్‌ మల్లన్న.. టీఆర్‌ఎస్‌ ప్రభుత్వంపై విమర్శలను ఎక్కుపెట్టారు. ఇంతకీ 7200 అంటే ఏమిటో తెలుసా? తెలంగాణ రాష్ట్రాన్ని పట్టిపీడిస్తున్న ముఠా సభ్యుల సంఖ్య 7200 అని తీన్మార్‌ మల్లన్న వివరించారు. వీరు జలగలుగా ప్రజలను పట్టిపీడిస్తున్నారని దుమ్మెత్తిపోశారు. రాష్ట్రంలో ఏ నాయకుడు ఎంత భూమిని కబ్జా చేశారో తన దగ్గర చిట్టా ఉందని, 15 వేల 14 ఇళ్లకు ఓ దొర చొప్పున తయారు అయ్యారన్నారు. వారి నుంచి ప్రజలను విముక్తి చేసేందుకు ప్రజా పోరాటం చేస్తానని ప్రకటించారు. తన క్యూన్యూస్‌ ఛానల్‌ ద్వారా ప్రజల తరపున ప్రశ్నిస్తున్నానని, ఇప్పుడు 7200 పేరుతో త్వరలో భారీ సభ ఏర్పాటు చేస్తామని తెలిపారు. క్యూన్యూస్‌ ఛానల్‌ను మూయించేందుకు కొందరు ప్రయత్నిస్తున్నారని, కానీ అది వారి వల్లకాదని తేల్చిచెప్పారు. కాగా, బీజేపీకి దాదాపు గుడ్‌బై చెప్పిన తీన్మార్‌ మల్లన్న తన భవిష్యత్‌ కార్యాచరణ ఏంటో త్వరలో తెలియజేస్తానన్నారు. (Story: కలకలం రేపిన తీన్మార్‌ మల్లన్న కామెంట్స్‌!)