హీరోయిన్‌పై రేప్‌ కేసు…పరారీలో యాక్టర్‌!

April 29, 2022

హీరోయిన్‌పై రేప్‌ కేసు…పరారీలో యాక్టర్‌!

Rape: ఒక హీరోయిన్‌పై రేప్‌ కేసులో ఓ ప్రముఖ నటుడు పరారీలో వున్న ఉదంతం సంచలనం సృష్టించింది. ఓ మళయాళీ నటిపై అత్యాచారం కేసులో ఆరోపణలు ఎదుర్కుంటున్న మలయాళ సినీ నటుడు, నిర్మాత విజయ్‌ బాబుపై పోలీసులు లుక్‌అవుట్‌ నోటీసులు జారీ చేశారు. అయితే అతను దేశంలోనే వున్నాడా లేదా దేశం విడిచి పరారయ్యాడా అన్నది పోలీసుల సందేహం. కేరళ రాష్ట్రం వెలుపలా అతని కోసం గాలింపు చర్యలు చేపడుతున్నట్టుగా పోలీసులు తెలిపారు. ఇప్పటివరకు బాబు ఇంకా దొరకలేదని వారన్నారు. ఏప్రిల్‌ 22న బాధితురాలు ఎర్నాకులం పోలీస్‌స్టేషన్లో ఫిర్యాదు చేసిన తర్వాత పోలీసులు రంగంలోకి దిగారు. అప్పటికే ఆమె ఓ ఫేస్‌బుక్‌ పోస్ట్‌లో విజయ్‌ బాబు గత నెలన్నరగా శారీరకంగా, లైంగికంగా తనను వేధింపులకు గురిచేశాడని ఆరోపించింది. నటిగా అవకాశాలిచ్చి వృత్తిపరంగా, వ్యక్తిగతంగా సహాయపడుతున్నట్టుగా నటిస్తూ తనకు దగ్గరయ్యాడని తెలిపింది. స్నేహం, ప్రేమ ముసుగులో తనను శారీరకంగా వేధించాడని, మత్తుమందిచ్చి అత్యాచారం చేశాడని, ఆ తర్వాత చాలాసార్లు వాడుకున్నాడని ఆమె ఆరోపించింది. కాకపోతే, ఈ ఆరోపణలను విజయ్‌ బాబు మంగళవారం ఫేస్‌బుక్‌ లైవ్‌ వీడియో ద్వారా ఖండిరచాడు. సదరు నటి తనకు ఐదేళ్లుగా తెలుసునని, ఈ విషయంలో తానే నిజమైన బాధితుడినని తెలిపాడు. అందుకు ఆమెపై పరువునష్టం దావా వేస్తానని అతను ప్రకటించినప్పటికీ, పోలీసులు మాత్రం ముందు అరెస్టయ్యాక…తర్వాత మాట్లాడదామని అంటున్నారట! (Story: హీరోయిన్‌పై రేప్‌ కేసు…పరారీలో యాక్టర్‌!)