ఇంతకీ ఏమిటా రహస్య గది?

April 29, 2022

ఇంతకీ ఏమిటా రహస్య గది?

Secret Chamber: తమిళనాడులో ఓ సీక్రెట్‌ ఛాంబర్‌ కలకలం రేపింది. కోట్లాది రూపాయల దొంగతనం కేసు ఓ రహస్యగది గుట్టువిప్పింది. అనుకోకుండా జరిగిన ఈ ఉదంతం ఆసక్తిని రేపింది. ఓ పారిశ్రామిక వేత్త ఇంటికి సున్నం కొట్టేందుకు వెళ్లిన నలుగురు కార్మికులు దొంగతనానికి పాల్పడి ఏకంగా రూ. 2.5 కోట్ల నగదును అపహరించుకెళ్లిన ఘటన ఆలస్యంగా వెలుగులోకి వచ్చింది. నలుగురు నిందితులు పట్టుబడినప్పటికీ, సీక్రెట్‌ ఛాంబర్‌ ఉదంతం మాత్రం అందరి కళ్లనూ తనవైపు తిప్పుకున్నది. తమిళనాడులోని తిరుప్పూర్‌కు చెందిన దురైస్వామి (56) ఓ బడా పారిశ్రామిక వేత్త. ఆయనకు నూలు ఉత్పత్తి మిల్లులు ఉన్నాయి. ఆయన కుమార్తెకు ఇటీవలనే పెళ్లయింది. ఇంట్లో భార్య ధనలక్ష్మితో పాటుగా వుంటున్న దురైస్వామికి సేవలు అందించేందుకు కొందరు పని వాళ్లు అవసరమయ్యారు. ఆ మేరకు కొందరు కార్మికులను వారు నియమించుకున్నారు. ఇంతలో అకస్మాత్తుగా తమ ఇంట్లో భారీ నగదు, నగలు మాయం కావడంతో దురైస్వామి చెన్నై పోలీసులను ఆశ్రయించారు. పోలీసులు చాలా జాగ్రత్తగా దర్యాప్తు చేశారు. రెండు నెలల క్రితం దొరైస్వామి కుమార్తె వివాహం జరిగిన సమయంలో సున్నం కొట్టే వాళ్లపై వారికి అనుమానం కలిగింది. వారిలో తిరువణ్ణామలైకు చెందిన సతీష్‌, దామోదరన్‌, శక్తి, నీలగిరికి చెందిన రాధాకృష్ణన్‌పై పోలీసులకు అనుమానం వచ్చింది. కార్మికులుగా వున్న ఆ నలుగురూ ఉన్నట్టుండి విలాసజీవితం గడపడంతో పోలీసులకు సహజంగానే సందేహం తలెత్తింది. తీరా…విచారణలో తేలిందేమిటంటే, సున్నం కొట్టే సమయంలో దురైస్వామి ఇంట్లో తమకు ఒక రహస్య గది కనిపించిందని, అందులోకి వెళ్లి చూడగా, కొన్ని చిన్న చిన్న సంచుల్లో రూ. 2 వేల నోట్లను మూటలు కట్టి పడేసి ఉన్నాయని, అందులో ఓ సంచితో తాము ఉడాయించినట్టు వారు అంగీకరించారు. దీంతో ఈ నలుగుర్ని బుధవారం అరెస్టు చేశారు. వీరు పట్టుకెళ్లిన నగదు రూ. 2.5 కోట్లుగా తేల్చారు. ఆ నగదు ఎక్కడున్నదీ ఆరా తీస్తున్నారు. ఇక 75 లక్షలు విలువైన బంగారంతో తమకు సంబంధం లేదని ఆ నిందితులు చెప్పడంతో ఆ దొంగల గురించి పోలీసులు అన్వేషణ మొదలుపెట్టారు. ఏదేమైనప్పటికీ, ఈ రహస్య గది రహస్యమేమిటో తేలిపోయింది. ఇంకో డబ్బు మూట కూడా అందులో వుంది. కాకపోతే ఆ పనివాళ్లు దాన్ని తీసుకువెళ్లలేదు. (Story: ఇంతకీ ఏమిటా రహస్య గది?)