భద్రాచలానికి రైలు…ఏపీని టచ్‌ చేయదు!

April 23, 2022

భద్రాచలానికి రైలు..ఏపీని టచ్‌ చేయదు!

Bhadrachalm: శ్రీసీతారాములు కొలువైన భద్రాచలం పట్టణానికి ఎట్టకేలకు రైలుమార్గం పడిరది. ఎప్పటి నుంచో భద్రాద్రికి రైల్వే లైను కావాలని డిమాండ్‌ వుంది. ఎట్టకేలకు రైలు రానున్నది. ఈ మేరకు రాములోరి సన్నిధికి రైలు రాకకు మార్గం సుగమమైంది. ఒడిశా నుంచి తెలంగాణలోని భద్రాలచలానికి రైలు మార్గం నిర్మాణం ప్రాజెక్టుపై రైల్వే మంత్రి అశ్వినీ వైష్ణవ్‌ కీలక సమీక్ష చేశారు. దక్షిణ అయోధ్యగా పేరుపొందిన భద్రాచలానికి రైలు సౌకర్యం కల్పించడమే లక్ష్యంగా ఒడిశా-తెలంగాణ మధ్య కొత్త రైల్వే లైన్‌ నిర్మాణం కానుంది. ఒడిశాలోని మల్కాన్‌గిరి నుంచి తెలంగాణలోని భద్రాచలం వరకు ఈ రైల్వేమార్గం వుంటుంది. రెండు రాష్ట్రాల్లోని మారుమూల గిరిజన ప్రాంతాలను అనుసంధానిస్తూ ఈ కొత్త లైన్‌ వేయనున్నారు. గిరిజన ప్రాంతాలకు రవాణా వసతిని మెరుగుపరిచేందుకు కేంద్ర ప్రభుత్వం తీసుకున్న నిర్ణయంలో భాగంగా ఈ కొత్త రైల్వే లైన్‌ నిర్మాణం కానున్నట్టు రైల్వే వర్గాలు తెలిపాయి. విచిత్రమేమిటంటే, ఈ రైల్వే మార్గం ఏపీని టచ్‌ చేయదు. ఆంధ్రాతో నిమిత్తం లేకుండానే ఒడిశా నుంచి తెలంగాణకు రైలు వెళ్లిపోతుంది. ఒడిశాలోని మల్కన్‌గిరి నుంచి తెలంగాణలోని భద్రాచలం వరకు మొత్తం 173.416 కిలోమీటర్ల నిడివి ఉండే ఈ లైన్‌ నిర్మాణానికి రూ.2,800 కోట్ల వరకు ఖర్చవుతుందని అంచనా. నదులు, వాగులు వంకలు ఉన్న నేపథ్యంలో ఈ మార్గంలో ఏకంగా 213 వంతెనలు నిర్మించేందుకు ప్రణాళికలు రూపొందించారు. వీటిల్లో 48 భారీ వంతెనలు ఉన్నాయి. గోదావరి నదిపై భారీ వంతెన కూడా ఇందులో భాగంగా నిర్మించనున్నారు. ఈస్ట్‌కోస్ట్‌ రైల్వే ప్రతిపాదించిన ఈ ప్రాజెక్టుకు గతేడాది సెప్టెంబర్‌లో రైల్వే బోర్డు పచ్చజెండా ఊపింది. ఇటీవలి బడ్జెట్‌లో ఫైనల్‌ లొకేషన్‌ సర్వే (ఎఫ్‌ఎల్‌ఎస్‌) కోసం రూ.3 కోట్లు ప్రతిపాదించారు. ఈ మేరకు మొదలైన సర్వే జూన్‌ నాటికి పూర్తి కానుంది. సర్వే నివేదికను పరిశీలించి రైల్వే బోర్డు అనుమతి ఇవ్వగానే పనులు ప్రారంభిస్తారు. ఈ కొత్త లైన్‌ ఒడిశాలోని మల్కన్‌గిరి, బదలి, కోవాసిగూడ, రాజన్‌గూడ, మహారాజ్‌పల్లి, లూనిమన్‌గూడల మీదుగా తెలంగాణలోకి ప్రవేశిస్తుంది. కన్నాపురం, కుట్టుగుట్ట, పల్లు, నందిగామ, భద్రాచలం వరకు సాగుతుంది. ఇప్పటికే ఉన్న భద్రాచలం-పాండురంగాపురం లైన్‌తో దీనిని అనుసంధానిస్తారు. మొత్తంగా 12 స్టేషన్లను అనుసంధానం చేస్తూ ఈ రైలు మార్గం ఏర్పాటవుతుంది. (Story: భద్రాచలానికి రైలు..ఏపీని టచ్‌ చేయదు!)