కేసీఆర్ ఫ్రంట్ పేరు బీఆర్ఎస్!

April 27, 2022

కేసీఆర్ ఫ్రంట్ పేరు బీఆర్ఎస్!

TRS: తెలంగాణ రాష్ట్ర స‌మితి (టీఆర్ఎస్‌) ప్లీన‌రీ బుధ‌వారంనాడు హైద‌రాబాద్‌లో విజ‌య‌వంతంగా ముగిసింది. టీఆర్ఎస్ అధినేత కే.చంద్ర‌శేఖ‌ర్‌రావు స్ఫూర్తిదాయ‌క‌మైన ప్ర‌సంగం చేసి కార్య‌క‌ర్త‌ల‌ను ఉత్తేజితుల్ని చేశారు. త‌న‌దైన శైలిలో ప‌దునైన మాట‌ల తూటాల‌తో కేంద్ర ప్ర‌భుత్వంపై మ‌రోసారి విరుచుకుప‌డ్డారు. బీజేపీ పాల‌న‌లో దేశం క‌ష్టాల‌పాలైంద‌న్నారు. గ‌వ‌ర్న‌ర్ల‌ను త‌మ చెప్పు చేతుల్లో పెట్టుకొని నియంతృత్వ పాల‌న కొన‌సాగిస్తున్నార‌ని ఆరోపించారు. అప్ప‌ట్లో ఎన్టీఆర్‌పై గ‌వ‌ర్న‌ర్ల‌ను ప్ర‌యోగించి, దుర్మార్గ‌మైన పాల‌న సాగించార‌ని, ఇప్పుడు అదే రీతిలో మోదీ స‌ర్కారు వ్య‌వ‌హ‌రిస్తున్న‌ద‌ని విమ‌ర్శించారు. మ‌తోన్మోదాన్ని రెచ్చ‌గొట్టే విధంగా మోదీ పాల‌న సాగుతోంద‌ని, దేశంలో అభివృద్ధి కుంటుప‌డుతోంద‌ని, మ‌త క‌ల్లోలాలు మాత్రం ఎన్న‌డూ లేనివిధంగా పెరిగిపోతున్నాయ‌ని అన్నారు. జాతిపిత మ‌హాత్మాగాంధీని విమ‌ర్శిస్తున్నార‌ని, ఇదే బీజేపీ వారు భార‌త స్వాతంత్య్రానికి ఇస్తున్న విలువ అని అన్నారు. మ‌రోవైపు గాంధీని చంపిన గాడ్సేను పొడుతున్నార‌ని, వారి నైజ‌మేంటో బ‌ట్ట‌బ‌య‌లైంద‌ని చెప్పారు. మోదీ పాల‌న కార‌ణంగా రైతులు క‌ష్టాల పాల‌య్యార‌ని చెప్పారు. దేశంలో అత్య‌వ‌స‌రంగా బీజేపీకి వ్య‌తిరేకంగా, ప్ర‌త్యామ్నాయంగా ఒక సంఘ‌ట‌న అవ‌స‌ర‌మ‌ని పిలుపునిచ్చారు. అయితే మ‌న‌కు కావాల్సింది రాజ‌కీయ ఫ్రంట్‌లు కాద‌ని, ప్ర‌త్యామ్నాయ అజెండా అని సూచించారు. ప్ర‌త్యామ్నాయ అజెండా ద్వారా ప్ర‌త్యామ్నాయ శ‌క్తి ఉద్భ‌విస్తుంద‌న్న‌ట్లుగా ఆయ‌న అభిప్రాయ‌ప‌డ్డారు. ఒక‌ప్పుడు తెలంగాణ గురించి మాట్లాడితే తిన్న‌ది అర‌గ‌ట్లేదా అని త‌న‌ను తిట్టార‌ని, ఇప్పుడేమందో అంద‌రికీ తెలుసున‌ని అన్నారు. అలాగే జాతీయ ప్ర‌త్యామ్నాయంగా గురించి చెపుతుంటే అవ‌హేళ‌న చేస్తున్నార‌ని, కానీ అది అత్య‌వ‌స‌ర‌మ‌ని, వ‌చ్చి తీరుతుంద‌ని, హైద‌రాబాద్ కేంద్రంగా వ‌స్తే ఇంకా మంచిద‌న్నారు. తెలంగాణ రాష్ట్ర స‌మితి త‌ర‌హాలోనే భార‌త రాష్ట్ర‌ స‌మితి (బీఆర్ఎస్‌) అనే ప్ర‌తిపాద‌న ఒక‌టి వ‌చ్చింద‌ని చెప్పారు. కాక‌పోతే రాజ‌కీయ అజెండాల కోసం అన్వేషించాల‌ని అభిప్రాయ‌ప‌డ్డారు. (Story: కేసీఆర్ ఫ్రంట్ పేరు బీఆర్ఎస్!)