కొండెక్కిన కోడి!

May 13, 2022

కొండెక్కిన కోడి!

చరిత్రలోనే ఆల్‌టైం రికార్డుకు చేరిన చికెన్‌ రేట్లు
రెండు వారాలుగా కోడికూర మానేసిన సామాన్యుడు

Chicken Rates: తెలుగు రాష్ట్రాల్లో కోడి కొండెక్కింది. కనీవినీ ఎరుగని రీతిలో చికెన్‌ రేట్లు విపరీతంగా పెరిగాయి. శుక్రవారంనాటి చికెన్‌ ధర కిలో 315 రూపాయలు పలికింది. సమ్మర్‌లో సాధారణంగా చికెన్‌ ధరలు తగ్గుతాయి. కానీ ఈసారి సీను రివర్సయింది. కోళ్ల ఉత్పత్తి అమాంతం తగ్గడం వల్ల సప్లయ్‌కి, డిమాండ్‌కు పొంతన లేకుండా పోయింది. దీంతో వినియోగదారులు చికెన్‌ కొట్లవైపు కన్నెత్తయినా చూడటం లేదు. ఎక్కుమంది చేపలు, మటన్‌వైపు మొగ్గుచూపుతున్నారు. విచిత్రమేమిటంటే, చికెన్‌ రేట్లు చూసి చేపల ధరలను కూడా పెంచేస్తున్నారు. సహజంగానే దళారీలు దొరికినకాడికి దోచుకుంటారు. చేపల ధరల విషయంలో అదే జరుగుతోంది. ప్రభుత్వాలు కూడా పెద్దగా పట్టించుకోవడం లేదు. కాగా, పౌల్ట్రీ చరిత్రలో ఎన్నడూ లేని విధింగా హోల్‌సేల్‌ మార్కెట్‌లో బాయిలర్‌ చికెన్‌ కిలో రూ.312కు చేరింది. లైవ్‌ ధర సైతం రికార్డు స్థాయిలో కేజీ రూ.166 చేరింది. కొన్నిచోట్ల ఆ రేటు మరీ పెంచేస్తున్నారు. ఈ ఏడాది జనవరి 1వ తేదీ కిలో చికెన్‌ ధర రూ.214 వుంది. ఫిబ్రవరి 1న అది రూ.220కి చేరింది. మార్చి 1 నాటికి రూ.270కి, ఏప్రిల్‌ 1 నాటికి రూ.236కు, మే 1 నాటికి 228కి పెరిగింది. అయితే కేవలం పది రోజుల వ్యవధిలోనే అంటే మే 12వ తేదీనాటికి చికెన్‌ కిలో ధర రూ.315కి చేరింది. గురువారం రూ.312 ఉన్న చికెన్‌ శుక్రవారం రూ.315కి చేరింది. ఇది స్కిన్‌లెస్‌ ధర. స్కిన్‌తో ఓ పది రూపాయలు తక్కువ వుంది. విచిత్రమేమిటంటే, గత పది రోజుల చికెన్‌ ధరల పట్టీలను చూస్తే రోజుకు కనీసం పది రూపాయల చొప్పున చికెన్‌ ధర పెరగడం విశేషం. ఆ రకంగా ఇది 300 మార్కు దాటింది. అయితే అతి త్వరలోనే ఇది 320 మార్కు కూడా దాటుతుందని చికెన్‌ ఉత్పత్తిదారులు చెపుతున్నారు. అసలు మార్కెట్‌లో కోళ్ల ఉత్పత్తే పడిపోయిందని, కోళ్ల మేతకు వాడే సోయ, తవుడు, మొక్కజొన్న వంటి ధరలు కూడా విపరీతంగా పెరిగాయని చెపుతున్నారు. ఇదే పరిస్థితి కొనసాగితే, ఈ నెలాఖరు నాటికి కిలో చికెన్‌ ధర రూ.350కి చేరే అవకాశం వుందని అంచనా వేస్తున్నారు. ఇంకో విచిత్రమేమిటంటే, నాటు కోడి ధర కిలో రూ.360 రూపాయలుగానే నిలకడగా కొనసాగుతోంది. దీని ధర కూడా పెరగవచ్చని అంచనా. (Story: కొండెక్కిన కోడి!)