మళ్లీ వైసీపీ అధికారంలోకి వస్తే రాష్ట్ర పరిస్థితేమిటి?

May 9, 2022

మళ్లీ వైసీపీ అధికారంలోకి వస్తే రాష్ట్ర పరిస్థితేమిటి?

Pawan Kalyan: జనసేన అధినేత పవన్‌ కల్యాణ్‌ ఏపీ రాష్ట్ర ప్రభుత్వంపై మరోసారి విరుచుకుపడ్డారు. రాష్ట్రంలో వైసీపీ మరోసారి అధికారంలోకి వస్తే రాష్ట్ర పరిస్థితి ఏమిటని విస్మయం వ్యక్తం చేశారు. రెండేళ్లపాలనకే ప్రజలు విసిగి వేసారిపోయారని, రాష్ట్ర పరిస్థితి దిగజారిపోయిందని, వచ్చే ఎన్నికల్లో వైకాపా వస్తే భవిష్యత్తు ఎలా ఉంటుందో ప్రజలు ఆలోచించుకోవాలని పవన్‌ కల్యాణ్‌ అన్నారు. గత అసెంబ్లీ ఎన్నికల్లో 151 మందిని గెలిపించి అధికారం ఇస్తే ఏం చేస్తున్నారని పవన్‌ నిలదీశారు. అద్భుత మెజారిటీ ఇస్తే.. ప్రజలకు సేవ చేయాల్సింది పోయి.. ప్రభుత్వం ప్రజలను చిత్రహింసలకు గురిచేస్తోందని ఆయన ఆరోపించారు. అసలు కన్నీళ్లు తుడవలేని అధికారం దేనికని అన్నారు. తాను అధికారం లేకుండానే కన్నీళ్లు తుడిచేందుకు ముందుకొచ్చానని గుర్తుచేశారు. జనసేనకు అధికారం ఇస్తే కొన్ని కోట్ల మంది కన్నీళ్లు తుడవగలనని ధీమా వ్యక్తం చేశారు. రాయలసీమలో పరిస్థితులు మారాలని… యువత ఇతర ప్రాంతాలకు, గల్ఫ్‌ దేశాలకు వెళ్లి చిన్న చిన్న ఉద్యోగాలు కాకుండా ఇక్కడే ఉపాధి అవకాశాలు కలిగేలా చూడాలన్నది తన కోరిక అని పవన్‌ కల్యాణ్‌ అన్నారు. రాష్ట్ర భవిష్యత్‌ కోసం ఆలోచించడంలో తాను ముందుంటానని తెలిపారు. పొత్తులపై తాను ప్రాకులాడటం లేదని, రాష్ట్ర భవిష్యత్‌ కోసం కలిసి వచ్చేవారితో పనిచేయాలని కోరుకుంటున్నట్లు పవన్‌ కల్యాణ్‌ చెప్పారు. ఓట్లు చీలిపోతే ప్రజలకు నష్టం జరుగుతుందని, పొత్తులపై చర్చలు అవసరమని అభిప్రాయపడ్డారు. తాను పుట్టిన కులాన్ని గౌరవిస్తానని, అంతేతప్ప కులాన్ని అడ్డంపెట్టుకొని రాజకీయాలు చేస్తే ఎవరికీ మనుగడ ఉండదని పవన్‌ కల్యాణ్‌ హెచ్చరించారు. (Story: మళ్లీ వైసీపీ అధికారంలోకి వస్తే రాష్ట్ర పరిస్థితేమిటి?)