మసీదులో శివలింగం!

May 16, 2022

మసీదులో శివలింగం!

కాశీ: మసీదులో శివలింగం కలకలం రేపుతోంది. ఉత్తరప్రదేశ్‌లో ప్రముఖ మసీదు జ్ఞానవాపిపై గత కొన్ని రోజులుగా వివాదం రగులుతున్న విషయం తెల్సిందే. అక్కడ ఉన్న దేవాలయాలను పడగొట్టి మసీదు కట్టారని ఆరోపణలు విన్పిస్తున్నాయి. దీంతో ఈ మసీదులో సర్వే కోసం కోర్టు న్యాయబృందాన్ని నియమించింది. ఈనేపథ్యంలో జ్ఞానవాపి మసీదులో శివలింగం వెలుగుచూసింది. కోర్టు ఆదేశాల మేరకు కాశీలోని విశ్వనాథుని ఆలయం పక్కనే ఉన్న ప్రముఖ జ్ఞానవాపి మసీదులో విచారణ సోమవారం ముగిసింది. కోర్టు నియమించిన కమిషనర్‌, న్యాయవాదుల బృందం గట్టి బందోబస్తు మధ్య ఈ పనిని పూర్తి చేసింది. వీడియోగ్రఫీ మధ్య మూడు రోజుల్లో (శనివారం నుంచి సోమవారం వరకు) పరిశీలన పూర్తి చేశారు. అయితే మసీదు లోపలి బావిలో శివలింగాన్ని కనుగొన్నట్టు న్యాయవాది విష్ణు జైన్‌ ప్రకటించారు. అలాగే రక్షణ కోరుతూ సివిల్‌ కోర్టును ఆశ్రయించనున్నట్టు ఆయన ప్రకటించారు. నిజానికి ఈ మసీదు వెలుపల హిందూ దేవుళ్లకు సంబంధించిన శిల్పాలు వున్నాయి. వాటికి స్థానిక ప్రజలు మొక్కులు చెల్లిస్తూ వుంటారు. అయితే మసీదు నిర్వాహకులు అభ్యంతరం పెట్టడంతో అక్కడ ప్రతిరోజూ ప్రార్థనలకు అనుమతినివ్వాలని స్థానికులు కోరడంతో వివాదం తలెత్తింది. కాశీ విశ్వనాథుని ఆలయాన్ని ఆనుకుని ఉన్నదానిని జ్ఞానవాపి-శృంగార్‌ గౌరీదేవి కాంప్లెక్స్‌గా పిలుస్తారు. ఇందులోనే మసీదు కూడా ఉంది. ఈ కాంప్లెక్స్‌ పశ్చిమాన హిందూ ఆలయాన్ని ధ్వంసం చేసిన ఆనవాళ్లు కనిపిస్తున్నాయని తెలిసింది.అయితే ఇక్కడ రోజువారీ ప్రార్థనలకు అనుమతించాలని, హిందూ దేవతల ఆనవాళ్లను తేల్చాలని కోరుతూ కొందరు మహిళలు వారణాసి జిల్లా కోర్టులో దాఖలు చేసిన పిటిషన్‌ ఆధారంగా ఈ సర్వే ప్రారంభమైంది. ఉద్రిక్తతల నడుమ ఈ సర్వే కొనసాగింది. ఒక దశలో..తాను ఇంటి బయటకు వెళ్తున్నప్పుడు ప్రతిరోజూ మా ఆవిడ భయపడుతోందని ఒక న్యాయమూర్తి ఈ సర్వే నేపథ్యంలో వ్యాఖ్యానించి సంచలనం సృష్టించారు. (Story: మసీదులో శివలింగం)