తెలంగాణలో భారీ వానలు : దెబ్బతిన్న రైతన్న

May 16, 2022

తెలంగాణలో భారీ వానలు : దెబ్బతిన్న రైతన్న

Rains in Telangana: పీల్చిపిప్పిచేస్తున్న మండుటెండల నుంచి తెలంగాణ ప్రజలకు ఉపశమనం కలిగింది. సోమవారం సోమవారం వేకువజామున హైదరాబాద్‌ సహా రాష్ట్రంలో వివిధ జిల్లాలో భారీ వర్షం కురిసింది. ప్రజలకు ఉపశమనమైతే కలిగింది గానీ…రైతన్న కడుపుకొట్టింది ఈ వాన. నల్లగొండ, సూర్యాపేట, యాదాద్రి భువనగిరి, మేడ్చల్‌, రంగారెడ్డి, హైదరాబాద్‌, మెదక్‌, సంగారెడ్డి, సిద్ధిపేట, వరంగల్‌, మహబూబాబాద్‌, జనగామ, హన్మకొండ, ములుగు, ఆదిలాబాద్‌, నిర్మల్‌, నిజామాబాద్‌, కామారెడ్డి, కరీంనగర్‌, పెద్దపల్లి, జగిత్యాల, రాజన్న సిరిసిల్ల, కొమురంభీమ్‌ ఆసిఫాబాద్‌ వంటి జిల్లాల్లో ఒక మోస్తరు నుంచి భారీ వర్షాలు కురిశాయి. ఖమ్మం, కొత్తగూడెం జిల్లాల్లోనూ ఓ మాదిరి వానలు పడ్డాయి. ఈదురు గాలులుతో కూడిన భారీ వర్షం కురియడంతో చెట్లు నెలకొరిగాయి. మామిడికాపు నేలరాలింది. దీంతో మామిడి రైతు కంట కన్నీరు మిగిలే పరిస్థితి దాపురించింది. కొన్ని చోట్ల ఉరుములు, మెరుపులతో కూడి భారీ వర్షాలు కురిశాయి. అయితే మార్కెట్‌ యార్డులు, ధాన్యం కొనుగోలు కేంద్రాల వద్దకు రైతులు విక్రయించేందుకు తీసుకువచ్చిన ధాన్యం రాశులు తడిసి ముద్దవడం దెబ్బతీసింది. తమ చెమట కష్టం నీటి పాలైందని రైతులు గోసపెడుతున్నారు. వాస్తవానికి, ఆదివారం సాయంత్రం నుంచే వాతావరణం ఒక్కసారిగా చల్లబడిరది. ఇదిలావుండగా, ఈ మేరకు ఆదివారం, సోమవారం హైదరాబాద్‌లోని పలు ప్రాంతాల్లో మోస్తరు జల్లులు కురిశాయి. ట్రాఫిక్‌ ఇబ్బంది తలెత్తింది. వాహనదారులు ఎక్కడికక్కడ నిలిచిపోయారు. పలు చోట్ల ట్రాఫిక్‌ జామ్‌తో వాహనరాకపోకలకు ఇబ్బందులు ఎదురయ్యాయి. కాగా, నాలుగు రోజులపాటు తెలంగాణ రాష్ట్రంలో వర్షాలు కురిసే అవకాశం వుందని భారత వాతావరణ శాఖ సూచించింది. (Story: తెలంగాణలో భారీ వానలు : దెబ్బతిన్న రైతన్న)