సైబర్‌ దగా: వెంకయ్యనాయుడు పేరుతో వీఐపీలకు గాలం!

April 24, 2022

సైబర్‌ దగా: వెంకయ్యనాయుడు పేరుతో వీఐపీలకు గాలం!

Cyber Crime: సైబర్‌ నేరగాళ్లు ప్రపంచంలో ఎవరినైనా టార్గెట్‌ చేయగలరు. తాజాగా వారు ఏకంగా భారత ఉప రాష్ట్రపతి వెంకయ్యనాయుడు పేరుతో జనాన్ని మోసం చేసిన ఉదంతం వెలుగులోకి వచ్చింది. వెంకయ్యనాయుడు పేరుచెప్పి భారీగా విరాళాలు సేకరించడానికి ప్రయత్నించిన సైబర్‌ నేరగాడిని పోలీసులు తెలివిగా పట్టుకున్నారు. ఉపరాష్ట్రపతి ముప్పవరపు వెంకయ్యనాయుడు పేరుతో ఒక వ్యక్తి వీఐపీలతో సహా వ్యక్తులకు వాట్సాప్‌ సందేశాలు పంపుతూ సహాయం, ఆర్థిక సహాయం కోరాడు. భారీగా వసూళ్లు కూడా చేపట్టాడు. ఇది తప్పుడు సందేశమని, ప్రజలు అలెర్ట్‌గా వుండాలని కోరుతూ ఉపరాష్ట్రపతి కార్యాలయం ఒక ప్రకటన విడుదల చేసింది. ఉపరాష్ట్రపతి వెంకయ్యనాయుడినని చెప్పుకొంటూ.. ఆర్థిక సహాయం కావాలని కోరుతూ. ఓ వ్యక్తి వీఐపీలకు, వీవీఐపీలకు వాట్సప్‌ సందేశాలు పంపడాన్ని గుర్తించారు. 94390-73183 మొబైల్‌ నంబరుతో ఈ సందేశాలు వెళ్లాయి. విషయం ఉప రాష్ట్రపతి దృష్టికి వెళ్లడంతో ఆయన తన సచివాలయం ద్వారా కేంద్ర హోం శాఖను అప్రమత్తం చేశారు. ఇటువంటి సందేశాలు మరిన్ని నంబర్ల నుంచి వచ్చే అవకాశం ఉన్నందున అప్రమత్తంగా ఉండాలని దేశ ప్రజలకు సూచించారు. గతంలో బెంగళూరుకు చెందిన సుకేష్‌ చంద్రశేఖర్‌ అనే వ్యక్తి చాలా నగరాల్లో ధనవంతులను మోసం చేశాడు. ఉద్యోగాల పేరుతో పలువురిని మోసం చేశాడు. రాజకీయ నాయకుడికి బంధువుగా నటించి 100 మందికి పైగా రూ.75 కోట్ల మేర మోసం చేసినట్లు సమాచారం. ఏదేమైనప్పటికీ, ఇలాంటి సైబర్‌ మోసం మరొకటి జరగకుండా ఉప రాష్ట్రపతి కార్యాలయం త్వరగానే స్పందించడం విశేషం. అయితే ఇప్పటికే ఆయన పేరుతోనూ, ఆయన నెంబర్‌తో ఏ మేరకు మోసం జరిగిందో ఇంకా తెలియరాలేదు. (Story: సైబర్‌ దగా: వెంకయ్యనాయుడు పేరుతో వీఐపీలకు గాలం!)