రాజశ్యామల యాగంతో సుభిక్షంగా వినుకొండ, రాష్ట్రం
శాంతి ఆశ్రమంలో విజయదశమి వేడుకల్లో పాల్గొన్న జీవీ, మక్కెన
న్యూస్ తెలుగు /వినుకొండ :శాంతి ఆశ్రమంలో పెద్దఎత్తున నిర్వహించిన రాజశ్యామల యాగంతో వినుకొండ నియోజకవర్గం , రాష్ట్రం మొత్తం సుభిక్షం కానుందని ఎమ్మెల్యే జీవీ ఆంజనేయులు అన్నారు. లోకకల్యాణం కోసం ఇలాంటి యజ్ఞయాగాదులు పెద్దఎత్తున నిర్వహించడం అభినందనీయమన్నారు. వినుకొండ, పల్నాడు ప్రాంత ప్రజలకు విజయదశమి పండగ శుభాకాంక్షలు తెలిపారు. పట్టణ సమీపంలో ని శాంతి ఆశ్రమం వద్ద హిమాలయ గురూజీ ఆధ్వర్యంలో ఘనంగా నిర్వహించిన విజయదశమి వేడుకలు శనివారం ముగిశాయి. ఎమ్మెల్యే జీవీ ఆంజనేయులు, మాజీ ఎమ్మెల్యే మక్కెన మల్లికార్జునరావు ముఖ్య అతిథులుగా పాల్గొన్నారు. ఈ సందర్భంగా నిర్వహించిన రాజశ్యామల యాగంలో పాల్గొని అమ్మవారికి ప్రత్యేక పూజలు నిర్వహించారు. ఎమ్మెల్యే జీవీ, మక్కెనను హిమాలయ గురూజీ శాలువాలతో ఘనంగా సత్కరించి శ్రీవారి ప్రతిమలు అందజేశారు. రాజశ్యామల యాగం శనివారం మహా పూర్ణాహుతితో పరిసమాప్తమైంది. అనంతరం ఎమ్మెల్యే జీవీ ఆంజనేయులు మాట్లాడుతూ. ప్రజలందరికీ అమ్మవారి ఆశీస్సులు ఉండాలని, ఆయురారోగ్యాలు, అష్టైశ్వర్యాలు ఇవ్వాలని ప్రార్థించా అన్నారు. వినుకొండ ప్రజలందరినీ రాజశ్యామల అమ్మవారు అనుగ్రహించాలని కోరుకున్నట్లు తెలిపారు. గురూజీ 10 రోజులు మౌనవ్రతం పాటించి చేసిన విశేష పూజలతో వినుకొండ, పల్నాడు, రాష్ట్రంతోపాటు దేశానికి కూడా సుభిక్షమని చెప్పారు. వారి కృపతో సమృద్ధిగా వర్షాలు పడ్డాయని.. ఫలితంగా పంటలు బాగా పండుతాయని, ప్రజలంతా ఆకలి బాధలు లేకుండా సంతోషంగా ఉంటారన్నారు. అందుకే రాజశ్యామలం లాంటి యాగాలు భవిష్యత్తులోనూ నిర్వహించాల్సిన అవసరం ఉందన్నారు. గ్రామదర్శిని కార్యక్రమా లను కూడా చేపట్టాలనే గురూజీ ఆలోచన ఎంతో మంచిదన్నారు. నవరాత్రుల్లో భాగంగా విశేష పూజలు నిర్వహించిన హిమాలయ గురూజీ, ఆయన శిష్య బృందానికి ప్రత్యేక అభినందనలు తెలియజేస్తున్నా అన్నారు. రాజశ్యామల యాగంలో పాల్గొనే అదృష్టం తమకు కలిగినందుకు పూర్వజన్మ సుకృతంగా భావిస్తున్నామని అన్నారు. అనంతరం మాట్లాడిన మాజీ ఎమ్మెల్యే మక్కెన మల్లికార్జునరావు హిమాలయ గురూజీ వినుకొండ పట్టణానికి వచ్చినప్పటి నుంచి ఇక్కడ కరవు కాటకాలు లేకుండా భూజలాలు అభివృద్ధి చెందుతున్నాయన్నారు. బొల్లాపల్లి ప్రాంతంలోనూ ఆ మార్పు కనిపించిందని ప్రజలంతా అనుకుంటున్నారన్నారు. ఎమ్మెల్యే జీవీ ఆధ్వర్యంలో హిమాలయ గురూజీ ఆశీస్సులతో నియోజకవర్గంలో చేపట్టిన పనులన్నీ పూర్తి కావాలని, బొల్లాపల్లి మండలం నీటి సమస్య తీరడంతో పాటు రామలింగేశ్వర స్వామి గుడి, ఘాట్ రోడ్, మంచినీటి పథకం పూర్తై సత్ఫలితాలు ఇవ్వాలని ఆ భగవంతుడిని ప్రార్థిస్తున్నట్లు చెప్పారు. సీఎం చంద్రబాబు, ఎంపీ లావు శ్రీకృష్ణదేవరాయలు, ఎమ్మెల్యే జీవీ ఆంజనేయులు వినుకొండ నియోజకవర్గాన్ని ఆదర్శంగా అభివృద్ధి చేయాలని కోరుకుంటున్నట్లు పేర్కొన్నారు. కార్యక్రమంలో శాంతి ఆశ్రమ ట్రస్టు సభ్యులు కనుగండ్ల. అనంత కోటేశ్వరరావు, పెండ్యాల. మోహన్ రావు, పెండ్యాల. పుల్లారావు, పెండ్యాల. కాశి, పప్పురావురి. సుధాకర్ ,తాతా. రమేష్, మునిరెడ్డి ,దొగిపర్తి. స్వామి, సత్య, సురేష్, జెట్టి. శ్రీనివాసరావు, ఆనంద్ కుమార్ నాయుడు ,తదితరులు పాల్గొని భక్తులకు తీర్థప్రసాదాలు అందజేశారు. (Story :రాజశ్యామల యాగంతో సుభిక్షంగా వినుకొండ, రాష్ట్రం)
